【新聞稿】228‧0記念行動——拆除威權．起造新國家

文／蔡瑞月舞蹈研究社、鄭南榕基金會

2 月 28 號、拜二早起、台灣社會各團體閣一擺集合、發起第 7 擺「228・0 記念行動」、呼籲所有人民行上街頭、做伙思考 228 大屠殺帶乎咱台灣 ê 痛疼、同齊治療咱歸个社會上深 ê 空嘴。以「拆除威權・起造新國家」做核心價值、訴求徹底清算中國黨等等加害者 kap 植民體制、chiah 袂乎繼承無公義利益 ê 兇手後代閣當選、好好仔起造自由・民主・台灣新國家。

2017 年、228 七十年、蔡瑞月舞蹈研究社 kap 鄭南榕基金會共同發起、綴 1987 年陳永興醫師、李勝雄律師 kap 鄭南榕先生發起「228 公義和平運動」ê 脚跡、招逐家做伙行出來、莊嚴來面對咱台灣歷史 ê 眞相。

今年、做伙來講台語、Sńg Kah 烏màmà 好無？、台灣人權促進會・人權公約施行監督聯盟・永社・司改會・暖暖蛇北區共學中心……等等 50 外个關心打拼自由民主人權價值 ê 人民團體 kap 學生組織合辦、閣一擺招人民鬥陣來行台灣 chit 條建國路。

以「拆除威權・起造新國家」做核心、點出中華民國政府對台灣社會造成外深 ê 傷害——228 是到今夭閣逐工發生 tī 每一個台湾人身軀頂 ê 代志。

Chit 擺行動宣言強調、咱台灣社會應該 kā 排除中華民國長期植民威權統治 ê 毒素列入優先事項、重新起造釘根台灣社會 ê 自由民主人權價值。
Chit 幾冬台灣本土政黨執政、打拼做民生經濟政策、tī 全世界疫情經濟倒退 lu ê 情形維持咱台灣社會穩定 ê 成績誠無簡單、不閣 nā 無積極處理咱台灣內部 ê 中國威權問題、咱台湾政黨選舉 mā 是選輸、閣乎 228 元兇後代當選台北市長 tiō 是閣一擺糟撻台灣。
228 元兇後代繼承無正義 ê 利益、伊不bat 道歉反省。Nā 社會有公義、中國黨根本無資格參選、不閣現實是伊 tī 台灣當選。Che 效果 tiō 是鼓舞新中國閣一擺侵略台灣、228 ē 閣一擺發生、咱个民生經濟文化成果閣一擺烏有去。咱不通驚爭議、驚無票、咱台灣無論政治界 iā是社會組織、lóng 愛仝心面對 chit ê 問題、台湾 chiah 有未來。

228・0 按算行過相關歷史地點、tùi「天馬茶房」出發、經過「專賣局台北分局」・「台北放送局」、上尾到 228 大屠殺 ê 起點——「行政長官公署（行政院）」。遊行過程 ē 用台語 kap 客語讀受難者名單。行政院頭前 ê 儀式 ē 用「手語念詩」來讀陳明仁老師「1947 寒冷 ê 春天」、用「無声」來表達受難者・家屬閣有歸个台灣社會「袂赴哭 ê 心声」。Mā 邀請李勝雄律師來講歷史、Omi Wilang 牧師 chhōa 逐家做伙爲台灣祈禱、咱做伙 siohsioh 咱流血 ê 靈魂。以蔡瑞月舞蹈社 ê「長春花」舞作改編 ê 儀式邀請群眾參與收尾、期待台灣人 tùi 苦難 ê 記池開出上水 ê 花蕊、天光 hit 工、台灣是新閣獨立 ê 國家。

面冊Fanpage｜228‧0紀念行動- Home

面冊活動頁｜https://bit.ly/3BFyDCL

合辦單位（Tng leh 增加….）
蔡瑞月舞蹈研究社、財團法人鄭南榕基金會、做伙來講台語、SŃG KAH 烏MÀMÀ 好無？FETN蠻番島嶼社、台灣基督長老教會、台灣人權促進會、陳文成博士紀念基金會、新國家 · 設計所 Sin-kok-ka Siat-kè-só、台灣廢除死刑推動聯盟、北區暖暖蛇自學團體、社團法人親子共學教育促進會、小民參政歐巴桑聯盟、台中市好民文化行動協會、靚舞集Satsangdance、人權公約施行監督聯盟、公投護台灣聯盟、台灣民團協會、Sè-kài Tâioân Bûn-hòa Lūn-tôaⁿ、TLH 台灣羅馬字協會、人民作主志工團、財團法人史明教育基金會、北鳥：歌唱革命、台文筆會、台越文化協會、客 客 客到人 Hakka Global、李江卻台語文教基金會、靜宜尋根樹、時代力量、社團法人華人民主書院協會、永社、蕭靜文舞蹈團、蔡瑞月文化基金會、海島演劇、香港邊城青年、民間司法改革基金會、台灣青年反共救國團、台灣圖博之友會、臺灣東突厥斯坦協會、泰雅爾族民族議會、台灣基督長老教會原住民宣教委員會