文／蔡瑞月舞蹈研究社、鄭南榕基金會

記者會時間：2022.02.22(拜二)下晡2:00 蔡瑞月舞蹈研究社

行動時間：2022.02.28(拜一)早時9:30 日新國小集合、10:30 天馬茶房起行
（遊行路線：10:30天馬茶房→專賣局台北分局→台北放送局（台灣廣播電台）→台灣行政長官公署（行政院）

2 月 28 號、拜一早起、50 外 ê 民間團體閣一擺集合、發起第 6 擺「228・0 記念行動」、呼籲所有人民行上街頭、做伙思考 228 大屠殺帶乎咱台灣 ê 痛疼、同齊治療咱歸个社會上深 ê 空嘴。以「拆除威權・起造新國家」做核心價值、訴求徹底清算中國國民黨 kap 相關勢力、鬥陣建立自由・民主・台灣新國家 ê 決心。

2017 年、228 七十年、蔡瑞月舞蹈研究社 kap 鄭南榕基金會共同發起、綴 1987 年陳永興醫師、李勝雄律師 kap 鄭南榕先生發起「228 公義和平運動」ê 脚跡、招逐家做伙行出來、莊嚴來面對咱台灣歷史 ê 眞相。

今年、做伙來講台語、Sńg Kah 烏màmà 好無？、台大台語文社、台灣人權促進會・人權公約施行監督聯盟・永社・司改會・暖暖蛇北區共學中心・東吳難容社……等等 50 外个關心打拼自由民主人權價值 ê 人民團體 kap 學生組織協辦、閣一擺招人民鬥陣來行台灣 chit 條建國路。

以「拆除威權・起造新國家」做核心、點出中華民國政府對台灣社會造成外深 ê 傷害——咱不 nā 失去足多足多勇敢 ê 台灣人 ê 性命、咱 ê 語言・咱 ê 歷史・咱 ê 記池・咱 ê 靈魂 mā lóng hông 奪去。

Chit 擺行動宣言強調、追究所謂抓耙仔 chit khoán 個人進前應該愛先「追究加害體制」、「終局拆除慈湖 kap 臭頭仔廟」是拆除威權 ê 第一步。台灣社會 chiah 通 kā 眞相看乎清楚、誠實來認bat 中國國民黨 kap 中華民國致使咱受傷有外深、轉型正義 chiah 有可能眞正開始。追求獨立建國 ê 台灣、mā 愛 ē記反抗中國 ê 經驗、kah 香港・TIBET・East Turkestan・世界各國結盟、做伙對抗危害全世界 ê 中國病毒 kap 中國帝國主義、開創自由民主 ê 未來。

228・0 按算行過相關歷史地點、tùi「天馬茶房」出發、經過「專賣局台北分局」・「台北放送局」、上尾到 228 大屠殺 ê 起點——「行政長官公署（行政院）」。遊行過程 ē 用台語 kap 客語讀受難者名單。行政院頭前 ê 儀式 ē 用「手語念詩」來讀陳明仁老師「1947 寒冷 ê 春天」、希望用「無声」來表達受難者・家屬甚至歸个台灣社會「袂赴哭 ê 心声」。Mā 邀請李勝雄律師來講歷史、林宗正牧師 chhōa 逐家做伙爲台灣祈禱、咱做伙 siohsioh 咱流血 ê 靈魂。以蔡瑞月舞蹈社 ê「長春花」舞作邀請群眾參與收尾、期待台灣人 tùi 苦難 ê 記池開出上水 ê 花蕊、天光 hit 工、台灣是新閣獨立 ê 國家。

面冊Fanpage｜228‧0紀念行動- Home｜面冊活動頁｜

【2/22記者會流程】